Inschpiriert dur d Basler Fasnacht – Sammet Fasnacht z Prag: en Apologie

 Fasnacht z Basel: dradizionell, wichtig inschpiriered – Fasnacht in Prag:??  Was für e Blöödsinn!  Und wo überhaupt isch denn das Prag?!

Im Joor 2012 het e Grubbe vo Studänte, Künstlerinne, Akademiker und andere Freiwillige die erschd Fasnacht in dr tschechische Hauptstadt organisiert, e satyyrisch uffzoogeni Brozessioon noonem Voorbild vom Basler Cortège. D Ydee stammt vo dr Olga Cieslarova, e Kennere vo Basel und döört Mitgliid vo dr Duschuurli-Glygge; si isch e Biwundere – en Aagfrässeni – vo dr bsundere Fasnachtdrazioon z Basel.

Aha: Noochaamer! Maine Iir me könn soone jorhundertalt Rituaal aifach verpflanze? Sinn Iir denn Bruuchtum-Ignorante? Daas kaa nit funggzioniere!

Joo, mr hän Laarven aa, wo mr unter Basler Aalaitig sälber kaschiere; mr hän au Zeedel und Ladäärne und mr spiile verschiideni Süüschees us em soziaale kulturellen und politische Lääbe in Tschechie us. Im Unterschiid ze Basel hammer aber e fixes Daatum, dr 17. Novämber, e wichtige Daag für unser Volgg: mr erinneren uns an Fall vom kommunistische Reschyym anno 1989, bikannt au als Sammet-Revoluzioon. Drum het unsri Veraastaltig au zwai Hauptzyyl: ainersyts s fyyrlig Gidängge ans Wiideruflääbe vo dr tschechische Zivyylgsellschaft und anderersyts s Refleggtiere vo de Schwiirigkaite, en aagmässeni kultiwierti Foorm fürs Usdrugge vo Grytigg im öffedlige Ruum.

Miir hän z Baasel duzedi Stammglygge und hunderti anderi Fasnachtsfoormazioone – und waas hän Iir?

Als Organisatoore hammer miesse s Brobleem loose, ass miir kaini sottigi Gruppierige vo Aggtyyve (ghaa) hän, wo birait sin Erschyynige oder Eraignis us em aigenen Umfäld oder dr globalisierte Wält grytisch öffedlig umzsetze: die tschechisch Zivyylgsellschaft stäggt allewyl in de Kinderschue und kämpft mit dr aigene Passyvitäät und em politisch Fatalismus.

Miir wänn si drum steergge, dur s Schaffe und Bikanntmache vo zem Dail scho vorhandene soziaali Netzwäärgg vo Künstler, Musikerinne, NGOs und andere Gruppierige, wo maischdens no in dr Isolazioon wiirgge; mir möchte für sii als Platfoorm diene.

Wel e Fasnacht e ganzi Bivölggerig mit allne soziaalen und kulturelle Hintergründ ka erfassen und inschpiriere, isch si unverglyychbaar gaignet, e Ziyvyylgsellschaft in beschter Usbräägig lo z erschyyne. Dasch s Ethos, wo mr wänn ‘transplantiere‘.

 Wie d Fasnacht z Basel öbbis Ainzigaartigs in dr Schwyz isch, isch d Prager Fasnacht öbbis aimoolig Ussergwöönligs in dr Tschechei, en unverglyychlig Eraignis in däm Land.

Mir möchte drum alle BaslerInne dangge für iiri Inschpirazioon und unsre FründInne und Expäärte für iiri immänsi Unterstützig, wo si uns vermittlet hän. Mr wäärde allewyl Grubben us Basel willkomme haisse, wo bi uns wänn mimache.

Fasnächtligi Griess

S Prager Fasnachtcomité
Olga Cieslarová, Pavla Bendová, Jan Kalous, Lucie Kmentová, Marjetka Kürner-Kalous, Martin Pehal, Jana Pilátová, Tereza Vohryzkova, Lucie Valentinová and Markéta Machková

Übersetzig: Werni z Basel